Diplomatenjagd

Luie niähmet ugg bläoß in acht,
wann im Biärge is Diplomatenjagd!
Et ies gefäöhrlick dao ächen im Waold,
wann et dao biuset un wann et dao knallt!
Dao kaste kapaoble Härens saihn,
dao sind de Büöwersten alle buinoin:
Direkters, Dokters un Potentaten,
Wirtschaftsbosse un Diplomaten.
Dai gaße häoge Politik
Kaweloiers un Blaoe driäpet sick.
Dai gräote Baron van Zytschewitz
un Ferdinand August van Kinkerlitz
un dai schiäle Bundespräsident,
diän Schulten Mariechen vam „Fernsehen“ kennt.
Dao sind tehäope Härens van Welt,
dai hät de Braiftaske vull van Geld!
Bläoß oinmaol im Jaohr sind dai dao im Waold.
Dai foiert daohenne, wann et dao knallt!
Dao stott se dann alle in oiner Ruige,
met Puisters, ä de Saldaoten im Kruige!
Dat mäket ne Spaß, op Duiers te schaiten
un ächter diän Jagdruies hier te flaiten!
Un hät se dann ois näo en „Bruch“ am Haut,
dann liäwet se wiällig op gräotem Faut!
Jao, dat is en Toiken van Geld un van Macht,
wemme gaohen kann op de „Häoge Jagd!“

aus dem Buch: „Wille Bärs Fürsterkes Jägerlatuin“